آخر الأخبار
Loading...
الاثنين، 14 مايو، 2012

Info Post

بلدنا من حقنا
المواطن المصري هو أهم حاجة وأهم من أي حد. صوتك مش معايا في الصندوق بس ، صوتك ورأيك مهمين علشان نصلح كل  حاجة مع بعض، مع بعض نقدر نحقق حلمنا.
 لازم نبنيها صح:
الدولة بقت زي أمنا الغولة، لازم نصلح المؤسسات علشان تعمل شغلها صح للمواطن. مش كل واحد يطلع معاش نجدد له أو نعمل له إنتداب. لازم نجدد دم الدولة.
 الشرطة:  دلوقتي (الشرطة في خدمة الشعب) حبر على ورق، ومطلوب منها (أمن حقيقي) مش أمن للنظام. هنشتغل على (المبادرة الوطنية لإعادة بناء الشرطة) وشعارها (شرطة لشعب مصر) ودي عملها قانونيين وحقوقيين وظباط ومواطنيين من كل التخصصات.
القوات المسلحة:  لازم تفضل (جيش شعب مصر) وتخرج بره حسابات السياسة والبزنس خصوصا في تعيينات قيادات الشركات والمسئولين علشان نبقى دولة مدنية. وننقل النشاط الإقتصادي غير العسكري للدولة نخلق بيه وظايف جديدة علشان تظهر قيادات مدنية شابة تقدر تنقل مصر، وتتتفرغ المؤسسة العسكرية للدفاع عن الحدود.
 القضاء المستقل في قراره وموارده يخلينا نطور النيابات والمحاكم ويكون فيه عدالة حقيقية وسريعة للمواطن.
 الحكومة ليها دور تنظيمي في حياة الناس، هنعمل (السجل القومي للتشريعات واللوائح) ومتاح للناس كلها علشان تعرفه. قررات الحكومة هنمشي فيها بمبادرة (إرادة) إللي طبقت على الواقع المصري كل الخبرة العالمية في مجال الأعمال والإقتصاد، هنشتغل على المبادرة دي ونوسعها على كل المجالات.
  التنمية مش سرقة وسمسرة على البلد:
القطاع الخاص إللي بيوفر ظروف عمل آدمية وقانونية للعاملين وبيشارك في الإنتاج لازم يتحرر من الروتين ومن الإحتكار والفساد علشان يقوم بدوره في تطوير البلد.
القطاع العام بيحمي حقوق المستهلك وبيمنع الإحتكار، هنحقق أرباح من ناحية ونقوم بدور إجتماعي نحقق بيه أهداف التنمية والأمان للمصريين. العمال هيساهموا في الإدارة زي القانون ما بيقول والرقابة شعبيىة تمنع البيروقراطية والفساد. كده كده إللي إتسرق مننا أيام النظام إللي فات هنرجعه لأنه ملك البلد.
القطاع التعاوني للزراعة والإسكان والصناعات الصغيرة مهم قوي لعدالة توزيع الثروة والعدالة الإجتماعية.
بلد تساع كل ولادها
البلد دي بلدنا كلنا ومن حقنا نعيش فيها من غير تمييز بسبب دين أو لون أو جنس ..... ذوي الإحتياجات الخاصة مواطنين في البلد دي وليهم عليها حق الرعاية وتوفير فرص عمل مناسبة تكفل لهم حياة كريمة.
حلم واحد أهداف كتيره
لو انت موظف محتاج نقابة تعرف تحافظ على حقك وتضمن شغلك متتظلمش فيه.
لو انت فلاح بنك التنمية والائتمان الزراعي يبقى بنك تعاوني ملك الفلاحين من غير استغلال ، ونعمل تمويل لإستصلاح الأراضي وبكده تتحقق العدالة الإجتماعية للفلاح. 
لو انت صياد فبالتأمين الصحي والإجتماعي ليك ولبيتك هتضمن عيشة كريمة، وسياسة واضحة للصيد تضمن بيها رزقك.
لو انت عامل يومية / تراحيل / شغال بالقطعة كلكم تعملوا تنظيمات عمالية تقدروا بيها تطلبوا أجر عادل وظروف شغل مناسبة، كمان تشتغلوا وفيه شروط أمن صناعي تحافظ عليكم وتأمين صحي يضمن لكم العلاج.
  لو انت عمالة مؤقته حقك إنك تتثبت وتضمن مكانك وشغلك.
المشاريع الحرفية والمتوسطة والصغيرة هي إللي هتستوعب البطالة، والدولة تلتزم بحد أدنى للدخل للعاطلين. الهيئة القومية للتشغيل هي المسئولة عن ملايين المصريين اللي عايزين يشتغلوا،والوظايف مش بالواسطة ويبقى فيه عدالة في التقديم والتعيين. بعد كده تساهم في تخطيط الإقتصاد وتنظيم العمل علشان نوصل للعدالة الإجتماعية.
  التعليم مش تجارة 
التعليم الجيد حق وواجب علي الدولة إنها تكفله مش تساعد عالتجارة فيه .. مش لازم نمد إيدينا علشان ولادنا يتعلمو ومينفعش ولادنا ميتعلموش علشان إحنا فقراء 
4/ صحة المواطن مسئولية الوطن:
الصحة مش حاجة بنشتريها علشان نبص للعرض والطلب، دي لازم تكون متوفرة بعدالة وكرامة لكل الناس.
 العلاج المجاني 
مش معناه علاج وحش، ينفع المستشفى والعيادة يبقوا كويسين ويبقى فيه دليل للخدمة . بس كمان الدكاترة والممرضين وكل إللي شغالي في الصحة نهتم بيهم علشان نعمل تأمين صحي صح.
  البلد مبتنساش ولادها:
فلوس التأمينات إللي إتسرقت لازم ترجع، وأصحاب الفلوس دي ليهم دور في إدارتها. كمان المعاشات القديمة تتراجع بما فيها الجيش والشرطة علشان الناس كلها تتساوى والمعاش يكون قد مصاريف السلع والخدمات الأساسية.
  الثورة تقدر تغير كل حاجة
العالم كله مبهور بينا ونقدر نكون مستقلين بقرارنا بالتواصل مع الشعوب، ومش تابعين لدولة أو لنظام سياسيا وإقتصاديا. هدفنا سياسة خارجية تخدم التنمية وتكون واقفة مع الشعوب العربية إللي بتحاول تتحرر من الظلم وأي شعب هيقف ضد القهر والإستغلال والإستعمار الجديد.
  الأمن القومي
 أكبر من الحدود السياسية بيشمل المنطقة العربية وأفريقيا ومنابع النيل . وعلاقتنا مع الدول دي مفيدة للطرفين وبتخلينا نقدر نقف في وش مصالح ورغبات الدول والقوى الكبرى.

0 هل عجبك الموضوع ..اكتب رأيك:

إرسال تعليق

مرحبا بالاصدقاء الاعزاء
يسعدنى زيارتكم وارجو التواصل دائما
Hello dear "friends
I am glad your visit and I hope always to communicate

 
جميع الحقوق محفوظة لــ انفراد